தமிழ்நாட்டில் பல மொழி பேசுகின்ற அரச மரபுகள் ஆட்சி செய்த காரணத்தால், தமிழைத் தவிர, தெலுங்கு, கன்னடம், வடமொழி, பாரசீகம், அரபு மொழிக் கல்வெட்டுகளும், கிழக்கிந்தியக் கம்பெனி வருகைக்குப்பின் சில ஆங்கிலக் கல்வெட்டுகளும் காணக்கிடைக்கின்றன.

          பிறமொழியில் உள்ள கல்வெட்டுகளும் தமிழ்மொழி வரலாறு அறியத் துணை புரிகின்றன. தமிழகத்தினை ஆண்ட விசயநகரர், நாயக்கர் காலத்தில் கட்டப்பட்டக் கோயில்களில் அவர்களது கல்வெட்டு பல தெலுங்கு மற்றும் கன்னட எழுத்துகளில் எழுதப்பெற்றன. மலையாள மொழி வட்டெழுத்துக் கல்வெட்டுகள் தமிழகத்தின் தென்பகுதி மாவட்டங்களில் கிடைக்கின்றன. ஆங்கிலேயர்கள் காலத்திய ஆங்கில மொழிக் கல்வெட்டுகள் தமிழகத்தில் கிடைக்கப் பெறுகின்றன. சிங்கள மொழியில் உள்ள கல்வெட்டில் தமிழ்ச் சொற்கள் உள்ளன. தமிழக இடப்பெயர்கள் இடம் பெற்றுள்ளன. அதுபோலவே அசோக மன்னன் வெட்டிய கல்வெட்டுகளில், சோழர், பாண்டியர் தொடர்பான தமிழ்ச் சொற்கள் இடம் பெற்றுள்ளன.

         அவ்வகையில் தமிழக மன்னர்கள் குறித்து வடநாட்டு மன்னர்கள் அறிந்திருந்தனர். தமிழகத்தை ஆட்சி செய்த பிற மொழி தேய அரசர்களின் வரலாற்றையும், அவர்கள் தமிழகக் கோயில்களுக்கு அளித்தக் கொடைகள் பற்றியும், அவ்வமயம் தமிழகத்தில் நிலவிய சமூகப் பண்பாட்டு பின்புலங்களையும் உய்த்துணர பிற மொழிக் கல்வெட்டுகள் உதவுகின்றன.