பல்லவ மன்னர்கள் தமிழகத்தை, கி.பி.3-ஆம் நூற்றாண்டிலிருந்து 9-ஆம் நூற்றாண்டு வரை ஆண்டிருக்கிறார்கள். துறையில் ஒப்பற்ற பணியைச் செய்த இம் மன்னர்களுடைய காசுகள் இதுவரையில் சரியாக ஆராயப்படவில்லை. கிடைத்துள்ள காசுகள் பெரும்பாலும் செப்புக் காசுகளாகவே உள்ளன. மெல்லிய தகடுபோல் உள்ள அவற்றின் ஒருபுறத்தில் காளை நின்ற அல்லது கிடந்த நிலையில் அமைந்திருப்பதைக் காணலாம். அதைச் சுற்றி கிரந்த எழுத்தில் மன்னனுடைய பெயர் காணப்படும். மகேந்திரவர்மன், முதலாம் நரசிம்மவர்மன் மற்றும் இராஜசிம்மன், மூன்றாம் நந்திவர்மன் ஆகியோர் வெளியிட்ட காசுகள் குறிப்பிடத்தக்கவை.

          ஸ்ரீநிதி, ஸ்ரீபரன், மானபரன் என்ற மூன்று பெயர்கள் கொண்ட காசுகள் குறிப்பிடத்தக்கவை. இம்மூன்றிலும் முதல் இரண்டும் கி.பி.700 முதல் 730 வரை ஆண்ட இராஜசிம்மப் பல்லவனுடைய பட்டப் பெயர்களாகும். எனவே அக்காசுகள் அம்மன்னன் காலத்தில் வெளியிடப்பட்டவை எனலாம். 'மானபரன்' என்பது தெள்ளாற்றெறிந்த நந்திவர்மன் பெயராகும். எழுத்துக்களே இல்லாத காசுகளும் பல உள்ளன. இதுபோன்று காளையை ஒரு புறத்தில் உடைய காசுகளின் பின்புறத்தில் பல சின்னங்கள் காணப்படுகின்றன. அவற்றில் சக்கரம் அசோகமரம், மீன், வில், விளக்கு, சங்கு கவரி, கொற்றக்குடை முதலியன காணப்படுகின்றன. சில காசுகளின் முன்புறம் சிங்கமும், பின்புறம் சங்கமும் காணப்படுகின்றன. ஒரு காசில் பின்புறம் கப்பல் காணப்படுகின்றது. பல்லவர் கடற்படையில் சிறந்திருந்ததையும், அக்காலத்தில்  கடல் வாணிகம் சிறந்திருந்தததையும் இது குறிக்கும்.