வீரன் வலக்கையில் வாளும் இடக்கையில் கேடயமும் வைத்துள்ளான். கழுத்திலும் மார்பிலும் அம்புகள் தைத்துள்ளன. இடையில் குறுவாள் உள்ளது. கைகளில் தொள்வளைகளும், இடையில் இடைக்கச்சையும், கழுத்தில் அணிகளும் காணப்படுகின்றன. விரைந்து செல்கின்ற தோற்றமுடைய இவ்வீரனின் இருகால்களின் கீழும் ஒவ்வொரு தலைகள் உள்ளன. வீரனின் வலப்புறம் இருமாடுகள் காணப்படுகின்றன. இந்நடுகல்லில் வீரனின் உருவம் அளவில் மிகப்பெரியதாக உள்ளது. வீரநுளம்பனது பதினைந்தாம் ஆட்சி ஆண்டில் சேவத்தூரை ஆண்ட மாமண்டைய்யன் என்பவன் தொறுக்கொண்டபோது அத்தொறு வினைமீட்டு, நடுகல்லில் உள்ள வீரன் தன்னடியாருடன் மாண்டதை இது குறிக்கிறது.